யாரும் குறை சொல்லமுடியாத ஆட்சி நடத்துகிறோம் என்று முதல்வர் ஸ்டாலின் ரொம்பவே பெருமையாக பேசுகிறார். ஆனால், தமிழகத்தில் நாள்தோறும் கொலை, கொள்ளை, பாலியல் வன்முறை நடந்துகொண்டே இருக்கிறது. சிறுமி முதல் பாட்டி வரை யாருக்கும் பாதுகாப்பு இல்லை. எனவே, எங்கெங்கும் ரத்தம் தெறிக்கிறது.
அண்ணா பல்கலைக்கழக மாணவிக்கு நியாயம் கிடைப்பதற்கு முன் கோவையில், கல்லூரி மாணவி ஒருவர் பாலியல் வன்கொடுமைக்கு உள்ளாக்கப்பட்டுள்ளார்கள். திமுக ஆட்சியில் தமிழ்நாட்டில் பாதுகாப்பான இடம் என்று எதுவும் இல்லை.
திருச்சியில் காவலர் குடியிருப்புக்குள் நுழைந்து காவல் சிறப்பு உதவி ஆய்வாளர் ஒருவரின் வீட்டில் தஞ்சம் புகுந்திருந்த ஒருவரை வன்முறை கும்பல் படுகொலை செய்கிறது. போலீஸ்காரரை வெட்டுகிறார்கள். மணல் திருடர்களை தட்டிக் கேட்டால் வெட்டிக் கொல்கிறார்கள். திமுக ஆட்சியில் எத்தகைய குற்றத்தையும் செய்யலாம்; அதற்காக எந்த தண்டனையும் தங்களுக்கு கிடைக்காது என்ற துணிச்சல் குற்றவாளிகளுக்கு ஏற்பட்டுள்ளது.
தமிழ்நாட்டில் காவல்துறை முழுமையாக தோல்வி அடைந்திருக்கிறது என்றால் அதற்கு முழு காரணம், மு.க.ஸ்டாலின் மட்டும் தான். ஒரு காலத்தில் ஸ்காட்லாந்து யார்ட் காவல்துறைக்கு இணையாக போற்றப்பட்ட தமிழக காவல்துறை இப்போது ஸ்டாலினுக்கு சலாம் போடுவதற்கு மட்டுமே அக்கறை காட்டுகிறது.
சட்டம் – ஒழுங்கைக் காக்கத் தவறிய திமுக அரசு, தமிழகத்தை ஆளும் தகுதியை இழந்து விட்டது. இதை மக்கள் வரும் தேர்தலில் காட்டுவார்கள்.
