அமெரிக்காவின் மிரட்டலுக்குப் பயந்து ரஷ்யாவிடம் இருந்து எண்ணெய்
வாங்கும் முடிவை இந்தியா கை விடுமா என்பது பெரும் சர்ச்சையாகிவருகிறது. பாகிஸ்தான்
தாக்குதல் தொடங்கி எண்ணெய் கொள்முதல் வரையிலும் இந்தியா விவகாரத்தை முதலில் அறிவிப்பவராக
அமெரிக்காவின் டிரம்ப் இருக்கிறார். அப்படியென்றால் அமெரிக்காதான் இந்தியாவை பொருளாதார
ரீதியாக ஆட்சி நடத்துகிறதா என்ற கேள்வி எழுகிறது.
இந்தியாவும் ரஷ்யாவும் கடந்த 70 ஆண்டுகளாக வலுவான மற்றும் நிலையான
உறவுகளைப் பராமரித்து வருகிறது. கடந்த 30 ஆண்டுகளாக விண்வெளி, அணுசக்தி மற்றும் பாதுகாப்பு
போன்ற துறைகளில் ரஷ்யா உடனான இந்தியாவின் ஒத்துழைப்பு அதிகரித்துள்ளது.
இந்தியாவில் ரஷ்யா மேற்கொண்டுள்ள முதலிடுகளில் எண்ணெய் மற்றும்
எரிவாயு, மருந்து, வங்கி. ரயில்வே மற்றும் இரும்பு போன்ற துறைகள் அடங்கும். அதே போல்
இந்தியாவும் ரஷ்யாவில் எண்ணெய், எரிவாயு மற்றும் மருந்து துறைகளில் முதலீடு செய்துள்ளது.
சர்வதேச சந்தையைவிட ரஷ்யாவிடமிருந்து மலிவான எண்ணெயைப் பெறுகிறது இந்தியா, ஆனால் அந்த
விலை வித்தியாசம் சீராக குறைந்து வருகிறது.
இந்த நிலையில் இனி ரஷ்யாவிடம் இருந்து இந்தியா பெட்ரோல் வாங்காது
என்று இந்தியாவின் கொள்கை மாற்றங்களை டிரம்ப் அறிவித்தார். இந்த விஷயத்தில் எதிர்க்கட்சி
தலைவர் ராகுல் காந்தி, “டிரம்பைக் கண்டு பிரதமர் மோதி அஞ்சுகிறார். ரஷ்யாவிடமிருந்து
எண்ணெய் வாங்குவதில்லை என டிரம்ப் முடிவெடுத்து அறிவிக்க நாம் அனுமதிக்கிறோம். புறக்கணிக்கப்பட்ட
பிறகு பிரதமர் வாழ்த்துச் செய்திகளை அனுப்பி வருகிறார். நிதியமைச்சரின் அமெரிக்க பயணம்
ரத்து செய்யப்பட்டுவிட்டது. பிரதமர் மோதி எகிப்துக்குச் செல்லவில்லை, ஆபரேஷன் சிந்தூர்
பற்றிய டிரம்பின் கருத்துகளை மறுக்கவும் இல்லை” எனத் தெரிவித்திருந்தார்.
அதேநேரம், டிரம்ப் பொய் சொல்வதாக இந்தியா வெளிப்படையாக கூறவில்லை.
அதே நேரத்தில் ரஷ்யாவிடமிருந்து எண்ணெய் இறக்குமதி செய்வதை நிறுத்துவதாக டிரம்புக்கு
வாக்குறுதி தரவில்லை என்றும் வெளிப்படையாக அறிவிக்கவில்லை.
ரஷ்யாவிடமிருந்து தொடர்ந்து எண்ணெய் வாங்கினால் நம்முடைய மிகப்பெரிய
வர்த்தக கூட்டாளியான அமெரிக்கா உடனான உறவுகள் பாதிக்கப்படும். ஒருவேளை எண்ணெய் வாங்குவதை
நிறுத்திவிட்டால், ரஷ்யாவுடனான நமது நீண்டகால நட்பு நம்பிக்கை இழந்து போகும். எனவே, இந்தியா தடுமாற்றமான நிலையில் உள்ளது. அமெரிக்காவின்
மிரட்டலுக்கு அஞ்சாமல் மோடி தைரியமாகப் பேசுவதற்கு முன்வர வேண்டும் என்பதே இந்தியர்களின்
விருப்பம்.
