விளையாட்டுத்துறையில் அடித்தட்டு மக்களில் ஒருவர் சாதனை புரியும் நேரத்தில், அவர்களுக்கு அதிக ஊக்கமும் ஆதரவும் கொடுக்கவேண்டியது அரசின் கடமை. ஆனால், அடித்தட்டு மக்கள் என்றாலே ஸ்டாலின் அலட்சியம் காட்டுகிறார் என்று அவரது கட்சியினரே வருத்தப்படுகிறார்கள்.
உலக செஸ் சாம்பியன்ஷிப் போட்டியில் வெற்றி பெற்ற தமிழகத்தைச் சேர்ந்த டி. குகேஷுக்கு 5 கோடி ரூபாய் பரிசு ஸ்டாலின் வழங்கினார். இப்போது பஹ்ரைனில் நடைபெற்ற ஆசிய இளையோர் கபடி போட்டியில் தங்கப் பதக்கங்களை வென்று தாயகம் திரும்பிய கண்ணகி நகர் கார்த்திகா, அபினேஷ் ஆகியோருக்கு தலா 25 லட்சம் ரூபாய் மட்டுமே ஊக்கத் தொகையாக வழங்கப்பட்டுள்ளது.
செஸ் விளையாட்டில் வென்ற குகேஷுக்கு 5 கோடி ரூபாயை வழங்கும்போது, தமிழகத்தின் பாரம்பரிய விளையாட்டான கபடியில் வென்ற கார்த்திகா, அபினேஷ் மோகன்தாஸ் ஆகியோருக்கு தலா 1 கோடி ரூபாயாவது தந்து இந்த அரசு ஊக்கப்படுத்தியிருக்க வேண்டும்.
எந்தவித அடிப்படை வசதியும் இல்லாமல் தன் திறமையால் பல சவால்களை கடந்து வாழ்க்கையில் சாதித்திருக்கிறார் கண்ணகி நகரைச் சேர்ந்த இளம் பெண்ணான கார்த்திகா கடும் சவால்களை கடந்தே இந்திய அணியில் இடம்பிடித்து, தங்கப் பதக்கத்தையும் வென்று கொடுத்துள்ளார். எனவே கார்த்திகா, அபினேஷ் மோகன்தாஸ் ஆகிய இருவருக்கும் தலா 1 கோடி ரூபாயையாவது இந்த அரசு வழங்கவேண்டும். மேலும் கண்ணகி நகர் பகுதியில் மிகச் சிறிய வீட்டில் வசிக்கும் கார்த்திகாவுக்கு அரசு சார்பில் ஒரு வீட்டையும் வழங்க வேண்டும். இதுதான் சமூகநீதியாக இருக்கும்.
