விஜய் கட்சியில் சேர்ந்திருக்கும் செங்கோட்டையன் அதிமுகவை அழிக்கப்போகிறேன் என்று சபதம் எடுத்திருப்பது கடுமையான எதிர்ப்பலையை எம்.ஜி.ஆர் ரசிகர்களிடம் உருவாக்கியுள்ளது.
இதுகுறித்துப் பேசும் அதிமுகவினர், ‘’தன்னை 9 முறை சட்டமன்ற உறுப்பினர் ஆகிய அதிமுகவை விட்டு தன்னுடைய சுயநலனுக்காக ஓடி சென்றவர் செங்கோட்டையன். கட்சியில் அவருக்கு தலைமை நிலைய செயலாளர், அவைத்தலைவர், அமைப்புச் செயலாளர் என்ற உச்சபட்ச பதவிகள் வழங்கி அழகு பார்த்தோம். ஆனால் இன்று அவர் நன்றி மறந்து விலை போய்விட்டார்.
‘நான் சாகும் வரை அதிமுகவில் தான் இருப்பேன்.. நான் இறந்த பிறகு என் மீது அதிமுக கொடியை தான் போர்த்த வேண்டும்’ என்று சொன்னார். ஆனால் இன்று அவரை ஆளாக்கிய இந்த இயக்கத்திற்கு துரோகம் செய்துவிட்டார்.
தவெகவில் இணைந்த செங்கோட்டையன் போகிற போக்கில் அதிமுக ஆட்சியை ஊழல் கட்சி என அடித்து விடுகிறார்.. ஊழலைப் பற்றி செங்கோட்டையன் பேசுவதற்கு அருகதை இருக்கிறதா? அம்மா கொடுத்த அமைச்சர் வாய்ப்பை தவறாக பயன்படுத்தி ஊழல் செய்த வரலாற்றை தமிழக மக்கள் யாரும் மறக்கவில்லை.
1991-96 காலகட்டத்திலே அம்மா அமைச்சரவையில் போக்குவரத்து துறை மற்றும் வனத்துறை அமைச்சராக இருந்த செங்கோட்டையன் செய்த ஊழல் கொஞ்சமாக நஞ்சமா?
போக்குவரத்துக் கழகத்துக்கு உதிரிப் பாகங்கள் வாங்கியது, சொகுசுபஸ் வாங்கியது, போலி பஸ் டிக்கட் அச்சடித்து விநியோகித்து மோசடி செய்தது ஆகியவற்றில் 1 கோடியே 57 லட்சத்து 93 ஆயிரத்து 527 ரூபாய் இழப்பு ஏற்பட்டதாகக் கூறி தனிநீதிமன்றத்தில் சி.பி.சி.ஐ.டி. போலீசார் வழக்கு தொடர்ந்தனர்.
இதுமட்டுமின்றி, இந்த ஐந்தாண்டு காலத்தில் அரசு போக்குவரத்து கழகங்களில் ஓட்டுநர் மற்றும் நடத்துனர் பணிகளுக்கு விண்ணப்பித்த சாதாரண குடும்பத்தைச் சேர்ந்த ஆயிரத்திற்கும் மேற்பட்ட இளைஞர்களிடம் லஞ்சம் வாங்கி பணி நியமனம் செய்த வகையில் இவர் செந்தில் பாலாஜியின் வழிகாட்டி எனலாம்.
இப்போது உத்தமர் போன்று பேசும் செங்கோட்டையன் 10 ஆண்டுகளுக்கும் மேலாக அரசு போக்குவரத்து கழகங்களில் தினக்கூலிகளாக வேலை தொழிலாளர்களான நடத்துனர்கள், ஓட்டுநர்களுக்கு நியாயமாக கிடைக்க வேண்டிய வேலையை மடைமாற்றி, அந்தப் பணியை விற்பனை பொருளாக்கி, வசூல் வேட்டை நடத்தினார்…’’ என்று புட்டுப்புட்டு வைக்கிறார்கள்.
இத்தனை வயதுக்குப் பிறகு லொள்ளு செய்யலாமா செங்கோட்டையன்..?
