கரூர் நெரிசலை அடுத்து என்ன செய்வதென்று தெரியாமல் விஜய் விழித்துவந்த
நிலையில், அமித்ஷா நேரடியாகவே பேசியதாகவும், ‘இனி பாஜக பார்த்துக்கொள்ளும்’ என்று உறுதி
கொடுத்ததாகவும் கூறப்பட்டது.
இதையடுத்து பாஜகவில் இருந்து ஹேமமாலினி தலைமையில் ஒரு டீம் களத்தில்
இறங்கி, எல்லா தவறுகளுக்கும் ஸ்டாலினே காரணம் என்று குற்றம் சுமத்தியிருக்கிறது. இதையடுத்து
விஜய் அரசியல் மூவ் எல்லாமே இனி பாஜகவே தீர்மானிக்கும் என்று சொல்லப்படுகிறது.
வரயிருக்கும் தேர்தலில் பாஜக கூட்டணியில் அல்லது அதிமுக கூட்டணியில்
விஜய் சேரவேண்டிய கட்டாயத்தை கரூர் சம்பவம் உருவாக்கியுள்ளது. ஒருவேளை திமுகவை எதிர்த்து
மெகா கூட்டணி உருவானால் என்ன செய்வது என்பது ஸ்டாலினுக்கு மிகப்பெரும் கவலை.
இந்த நிலையில் ஸ்டாலினுக்கு கை கொடுக்க வந்திருக்கிறார் சீமான்.
ஏற்கெனவே விஜய் வருகையினால் அதிகம் பாதிக்கப்பட்டவர் சீமான் மட்டுமே. விஜய் வந்தபிறகே
சீமானுக்கு இளைஞர்களிடத்தில் இருந்த முக்கியத்துவம் குறையத் தொடங்கியது.
இதுவரை வரை சீமானுக்கு வந்த ஓட்டுக்கள், பெரும்பாலும் அப்படியே
விஜய்யின் பக்கம் திரும்பப் போகிறது. திமுக, அதிமுக, பாமக, காங்கிரஸ், விசிக போன்ற
கட்சிகளில் இருக்கும் இளைஞர்களின் ஓட்டுக்கள் கூட விஜய்க்கு மாறப் போகிறது என்கிறார்கள்.
இதனால் பாதிக்கப்படப் போவது நாதக. இந்த கட்சி சென்ற தேர்தலில் வாங்கிய ஓட்டுக்கள் சதவிகிதம்
இந்த தேர்தலில் அதல பாதாளத்தில் விழப் போவதை சீமானே உணர்ந்துள்ளார்
அதன் பிறகு சீமானின் அரசியலில் சில மாற்றங்கள் கண்கூடாக தெரிந்தது.
அதனை தொடர்ச்சியாக செய்வதா? வேண்டாமா? என ஆலோசிக்கவே சில நாட்களில் முதல்வரின் மருமகனான
சபரீசனை ரகசியமாக சந்தித்து பேசியிருக்கிறார் சீமான் என கூறப்பட்டது. இந்த சந்திப்பின்போது
தனக்கு நெருக்கமான ஒரு சிலரை மட்டுமே அழைத்துச் சென்று மணி கணக்கில் ஆலோசனை செய்திருக்கிறார்
சீமான்.
2026 ஆம் ஆண்டு சட்டமன்ற தேர்தலில் பலமான அணிகள் போட்டியிடுவதால்
நாதகவின் வாக்கு வங்கி சரியும் அபாயம் ஏற்பட்டிருக்கிறது. ஒருவேளை வாக்கு சதவிகிதம்
குறைந்துவிட்டால் நாதகவின் எதிர்காலம் பெரிய அளவில் கேள்விக்குறியாகும். எனவே வாக்கு
சதவீதத்தை அதிகரிக்கும் முயற்சியில் ஈடுபட்டுள்ள சீமான் இந்த முறை சில எம்எல்ஏக்களுடன்
கோட்டைக்குச் சென்று விட வேண்டும் என்ற திட்டமிட்டுள்ளார்.
இந்நிலையில், தனித்து களமிறங்குவதாக கூறி வந்த விஜய், கரூர் சம்பவத்திற்கு
பிறகு பாஜகவுடன் கூட்டணி அமைக்க உள்ளதாகவும், தவெகவுக்கு அமித் ஷா ஆதவளித்து வருவதகாவும்
அடித்துச் சொல்கிறார்கள் அரசியல் பார்வையாளர்கள். இது திமுகவை அதிர்ச்சிக்குள்ளாக்கி
இருக்கிறது. இதனையடுத்தே முன்பே சீமானிடம் டீல் பேசியுள்ள திமுக, நாதகவை கூட்டணிக்குள்
இழுக்க வேண்டும் என மீண்டும் கச்சை கட்டி இறங்கியுள்ளதாக கூறுகின்றனர். சீமானிடம் உள்ள
8 சதவிகித வாக்கு வங்கி திமுக கூட்டணிக்கு கைகொடுத்தால் மாபெரும் வெற்றி பெற முடியும்
என்று கணக்கு போட்டிருக்கிறார்கள்.
எனவே, பாஜகவுக்கு விஜய் இறங்கினால் திமுகவுக்கு சீமான் வருவது
உறுதி. அனல் பறக்கப்போகிறது.
