தமிழகத்தில் போதை விற்பனை கொடி கட்டிப் பறக்கும் நிலையில் முதலீடு என்று ஸ்டாலினும் கார் ரேஸ் என்று உதயநிதியும் போட்டோஷூட் நடத்தினால் போதுமா என்று கடும் கண்டனம் எழுப்பியிருக்கிறார் எதிர்க்கட்சித் தலைவர் எடப்பாடி பழனிசாமி.

இது குறித்து எடப்பாடி பழனிசாமி, ‘’விடியா திமுக அரசின் விளம்பரங்களுக்கு அப்பால் செய்திகளைப் பார்த்தால், வழக்கம் போல சட்டம் ஒழுங்கு சீர்கேடுகளும் போதைப்பொருள் புழக்கமுமே விடியா அரசின் உண்மை அடையாளங்களாக நாளிதழ்களை அலங்கரிக்கின்றன. வாரக் கொலைப் பட்டியல்கள் தொடர்கின்றன. போதைப்பொருள் புழக்கமும் கடுகளவு குறைந்த பாடில்லை.

விடியா திமுக ஆட்சியில் சர்வதேச போதைப்பொருள் கடத்தல் வலையமைப்பில் தமிழ்நாடு முக்கிய இடம் வகிக்கிறது என்றாலும் மிகையாகாது. இளைஞர்கள், குறிப்பாக கல்லூரி மாணவர்கள் இடையே இந்த போதைப்பொருட்கள் சர்வசாதாரணமாக புழங்குவதை சமீபத்திய செய்திகள் உணர்த்துகின்றன. இது மிகுந்த கவலையளிக்கிறது.

வெளிநாட்டு போட்டோஷூட்டிலும், ஆடம்பரப் பகட்டு கார் ரேஸிலும் மட்டுமே கவனம் செலுத்தி, அதன் வர்ணஜாலங்களுக்கு இடையே தமிழ்நாட்டின் உண்மை அவல நிலையை மறைக்க முயற்சிக்கும் விடியா திமுக அரசுக்கு எனது கடும் கண்டனம்.

அடுத்து என்ன விளம்பரம் என்பதில் மட்டுமே இருக்கும் கவனத்தை, மாநிலத்தின் அடிப்படை பிரச்சனைகளான சட்டம் ஒழுங்கை சீர்படுத்துவதிலும், போதைப்பொருள் புழக்கத்தை ஒழிப்பதிலும் கவனம் செலுத்துமாறு விடியா திமுக முதல்வரை வலியுறுத்துகிறேன்’’  என்று கண்டனம் தெரிவித்திருக்கிறார்.

மாஜி அமைச்சர் விஜயபாஸ்கர், ‘’யாரையோ திருப்தி படுத்துவதற்கு இந்த கார் ரேஸ் நடத்தப்பட்டிருக்கிறது’’ என்று எதிர்ப்பு தெரிவித்திருக்கிறார்.

மாஜி அமைச்சரும், ‘’இது கார் பந்தயமா அல்லது நாய் பந்தயமா?’’ என்று குறுக்கே நாய் புகுந்த விவகாரத்தில் கிண்டல் செய்திருக்கிறார். கார் பந்தயம் முடிஞ்சும் இவங்க ஆதங்கம் அடங்க மாட்டேங்குதே.