எஸ்.ஐ.ஆருக்கு எதிராக திமுக கூட்டணிக் கட்சிகள் தமிழகம் முழுக்க
எதிர்ப்பு தெரிவித்து போராட்டம் நடத்தின. அதோடு உச்ச நீதிமன்றத்தில் இதை எதிர்த்து
வழக்கு போட்டுள்ளனர். அதேநேரம், எஸ்.ஐ.ஆர். திருத்தம் செய்யும் ஊழியர்களுடன் திமுக
ஏஜெண்ட்கள் கண் கொத்திப் பாம்பாக சுற்றுகிறார்கள். இந்த விவகாரம் மற்ற கட்சியினரை சூடேற்றியுள்ளது.
சிறப்பு தீவிர வாக்காளர் திருத்தத்தை ரத்து செய்யக் கோரி திமுக,
காங்கிரஸ், சிபிஎம் உள்ளிட்ட கட்சிகள் உச்சநீதிமன்றத்தில் மனு தாக்கல் செய்தன. நீதிமன்றத்தில்
ஆஜரான மூத்த வழக்கறிஞர் கபில் சிபில், “தமிழ்நாட்டில் தற்போது மழை பெய்யும் காலம்.
அதிகாரிகள் மழைக் கால பணிகளை கவனிக்க வேண்டி உள்ளது. அடுத்து ஜனவரியில் பொங்கல் அறுவடை
காலம் வரும். டிசம்பரில் கிறிஸ்துமஸ் பண்டிகை வருகிறது. இந்த நேரங்களில் பொதுமக்கள்
வாக்காளர் பட்டியல் திருத்தத்தில் முழுமையாக பங்கேற்க இயலாது.
குறிப்பாக ரெவன்யூ அதிகாரிகள் மற்றும் பிற மாநில அதிகாரிகள் பருவமழை
வெள்ளம் உள்ளிட்ட பணிகளுக்காக ஈடுபடுத்தப்படுவார்கள். எனவே அந்த சமயத்திலும் இந்த எஸ்.ஐ.ஆர்.
நடவடிக்கையை மேற்கொள்வதில் பல பிரச்சனையான சூழல் உள்ளது. பல இடங்களில்
இணையதள சேவைகள் இல்லை. பின்தங்கிய இடங்களில் பல பிரச்னைகள் உள்ளது.
தற்போது வாக்காளர் பட்டியல் திருத்தம் தொடங்கி விட்டது. ஒரு மாதத்தில்
முடிக்க உள்ளனர். இது வாக்காளர்களுக்கு பெரும் பாதிப்பை ஏற்படுத்தும். லட்சக்கணக்கான
விவரங்களை பதிவேற்றம் செய்ய வேண்டி உள்ளது. அதற்குப் போதிய அவகாசம் இல்லை” என வாதிட்டார்.
இதையடுத்து தொடர்ந்து, அனைத்து மனுக்களின் நகல்களையும் தேர்தல்
ஆணைய தரப்புக்கு வழங்க நீதிபதிகள் உத்தரவிட்டனர். மேலும், திமுக, தமிழ்நாடு காங்கிரஸ்,
சி.பி.எம் கட்சிகள் உள்ளிட்ட 6 புதிய மனுக்கள் மீது இரண்டு வாரத்தில் பதிலளிக்க தேர்தல்
ஆணையத்துக்கு நோட்டீஸ் வழங்கி உச்ச நீதிமன்றம் உத்தரவிட்டது.
ஆனால், நீதிமன்றத்தில் திமுகவுக்கு ஆதரவான தீர்ப்பு வருவதற்கு
வாய்ப்பு இல்லை என்பது முந்தைய வழக்குகளில் இருந்து தெரியவருகிறது. எனவே, திமுக கடுமையான
கிரவுண்டு வேலைகளை செய்து வருகிறது.
திமுகவினர் பூத் வாரியாக வரும் தேர்தல் ஆணைய அதிகாரிகளுடன் செல்கின்றனர்.
திமுக பூத் ஏஜெண்டுகள், நிர்வாகிகள் பிஎல்ஓ அதிகாரிகளுடன் பயணம் செய்து வாக்காளர்கள்
விடுபடாமல் இருப்பதை உறுதி செய்கின்றனர். மக்களிடம் என்னென்ன ஆவணங்கள் தர வேண்டும்
என்பதை தீவிரமாக விளக்கி வருகின்றனர்.
50 லட்சம் முதல் 1 கோடி வாக்குகள் கூட நீக்கப்படலாம், என்ற அச்சம்
ஆளும் தரப்பிடம் நிலவுகிறது. எனவே, இந்த விவகாரம் பாஜகவை அதிர வைத்துள்ளது. பீகார்,
மேற்கு வங்கத்தில் இப்படி நடக்காமல் தேர்தல் ஆணையம் நினைத்ததை சாதித்தது. தமிழகத்தில்
அதற்கு வாய்ப்பு இல்லை என்பது தெரியவரவே, பாஜகவினர் புலம்புகிறார்கள்.
