கரூர் மரணங்களில் அரசு மீத் குற்றச்சாட்டு வைப்பவர்களை எல்லாம்
திமுக அரசு தொடர்ந்து கைது செய்துவருகிறது. இந்த நிலையில் நேற்றைய எழுச்சிப்பயணத்தில்
நேரடியாக திமுக மீது குற்றச்சாட்டு வைத்திருக்கிறார் எடப்பாடி பழனிசாமி.
நேற்றைய கூட்டத்தில் பேசிய எடப்பாடி பழனிசாமி, ‘’ஆர்ம்ஸ்ட்ராங்
கொலை வழக்கில் முதல் குற்றவாளி இன்று இறந்துவிட்டதாக செய்தி வந்திருக்கிறது. ஏற்கனவே
ஒருவர் சரண் அடைந்தார், அவரை என்கவுண்டர் செய்துவிட்டனர், இதில் ஏதோ மர்மம் இருக்கின்றது,
சிபிஐ விசாரணை வேண்டும் என்று அவருடைய குடும்பத்தினர் நீதிமன்றத்தை நாடி, நீதிமன்றம்
தீர்ப்பு கொடுத்திருக்கிறது. இதை எதிர்த்து அரசு உச்சநீதிமன்றம் சென்றிருக்கிறது, யாரைக்
காப்பாற்ற நீங்கள் இவ்வளவு முயற்சி எடுக்கிறீர்கள்? உண்மை நிலை மக்களுக்குத் தெரிய
வேண்டும். மாநில அரசு உண்மையை மறைக்கிறது. சிபிஐ விசாரணைக்கு அரசு ஒத்துழைக்க வேண்டும்
என்பதையே மக்கள் எதிர்பார்க்கிறார்கள்.
காவல்துறை இன்று ஓரளவுக்கு பாதுகாப்பு கொடுத்தார்கள். இந்த பாதுகாப்பை
ஏற்கெனவே கொடுத்திருந்தால் 41 உயிர்களை இழந்திருக்க வேண்டிய அவசியமில்லை. 171வது தொகுதியில்
இப்போது பேசுகிறேன், இந்த சம்பவம் நடந்த பின்னர்தான் போலீஸ் பாதுகாப்பு கொடுக்கிறது.
முன்பு அங்கொன்றும் இங்குமாக நிற்பார்கள், சும்மா வேடிக்கை பார்ப்பார்கள். அதுவே முதல்வர்
என்றால் ஆள் இல்லாத இடத்தில் எல்லாம் பாதுகாப்பு கொடுக்குறார்கள், ஆயிரக்கணக்கான பேர்
பாதுகாப்பில் ஈடுபடுகின்றனர். நாங்கள் வேண்டாம் என்று சொல்லவில்லை, அதே போன்று எதிர்க்கட்சி
நடத்தும் கூட்டத்துக்கும் முழுமையான பாதுகாப்புக் கொடுப்பது அரசின் கடமை.
நாமக்கல்லுக்கும் கரூருக்கும் வந்தநேரத்தில் முறையான பாதுகாப்பு
கொடுக்கப்பட்டிருந்தால் அசம்பாவிதத்தைத் தவிர்த்திருக்கலாம். ஸ்டாலின் அவர்களே, தமிழகத்தை
தலைகுனிய விடமாட்டேன் என்று கர்ஜிக்கிறீர்கள், ஆனால் இந்திய அளவில் தமிழகம் தலைகுனிந்து
நிற்கும் காட்சியைப் பார்த்துக்கொண்டிருக்கிறோம். 41 உயிர்கள் பலியானதற்கு யார் காரணம்?
அரசு சரியான நடவடிக்கை எடுக்காததால் இத்தனை உயிர்களை இழந்திருக்கிறோம்.
தமிழர், தமிழர் என்று சொல்லிக்கொண்டிருக்கும் முதல்வர் அவர்களே,
தமிழ்நாட்டைச் சேர்ந்தவர்கள் தான் 41 பேர் இறந்திருக்கிறார்கள். வாயளவில் சொன்னால்
போதாது காரியத்தில் செயலில் காட்ட வேண்டும். இவ்வளவு பேர் பலியானதற்கு காரணம் பாதுகாப்புக்
கொடுக்காததுதான். ஏதோ குற்றம் சாட்டவில்லை நடக்கின்ற சம்பவம் நிகழ்வுகளை மக்கள் பார்த்துக்கொண்டு
இருக்கிறார்கள். இதையெல்லாம் முதல்வர் கவனிக்கவில்லை என்றால், அடுத்தாண்டு தேர்தலில்
டெபாசிட் கூட உங்கள் கட்சி வாங்க முடியாது’’ என்று எச்சரிக்கை செய்திருக்கிறார்.
ஸ்டாலின் கைது செய்வாரா… கண்டுகொள்ளாமல் போவாரா..?
