ஜெயலலிதா மரணத்திற்கு நீதி கேட்டு ஓ.பன்னீர்செல்வம் போராட்டம் நடத்திய நேரத்தில், ஒரு புரட்சிகரமான அரசியல்வாதியாகப் பார்க்கப்பட்டார். நியாயத்துக்கும் நீதிக்கும் பன்னீர் போராடுவார் என்றெல்லாம் எதிர்பார்க்கப்பட்டது. ஆனால், அவரது போராட்டம் எல்லாமே ஒரு துணை முதல்வர் பதவியிலேயே முடிந்து போனது.
அதன்பிறகு அவர் எடுத்த எல்லா முடிவுகளுமே அவருக்கு எதிராக அமைந்தது. தலைமைக் கழகத்தை கைப்பற்றப் போவதாகச் சொல்லி, கதவை உடைத்து கெட்ட பெயரை சம்பாதித்துக்கொண்டார். எடப்பாடியுடன் பொதுச்செயலாளர் போட்டி போட முடியாமல் தோற்றுப் போனார். அதன்பிறகு மோடியின் கைப்பாவையாக மட்டுமே இருந்தார்.
இப்போது அதற்கும் ஆபத்து. டெல்லிக்கு இப்போது எடப்பாடி செல்லப்பிள்ளையாக மாறிவிட்டார். ஆனாலும் தானும் ஓர் ஓரத்தில் இருக்கலாம் என்று ஆசைப்பட்டார். காலில் விழும் அளவுக்குக் கெஞ்சி கேட்டுக்கொண்டார். ஆனால், பன்னீரை மோடி கண்டுகொள்ளவே இல்லை. இதனால் மீண்டும் பன்னீருக்குக் கோபம் வந்துவிட்டது.
இந்த முறை நேரடியாக எதிர்முகாமுக்கு போய் சலாம் போட்டுவிட்டார். அவருக்குத் தேவை ஒரு எம்.எல்.ஏ. பதவி அதற்காக எந்த எல்லைக்கும் செல்வதற்கு பன்னீர் தயார் என்பதையே இந்த செயல் காட்டுகிறது.
பிரதமரை சந்திக்க வேண்டும் என்று பன்னீர் கேட்டிருந்தால் ஏற்பாடு செய்திருப்பேன் என்று நயினார் நாகேந்திரன் சொல்கிறார். அதற்கு நயினாரிடம் கேட்டுத்தான் கடிதம் எழுதினேன் என்று அவரையும் கோர்த்துவிட்டிருக்கிறார். ஆக, பன்னீரின் புதிய பல்டி மீண்டும் ஒரு முறை கேவலமான விமர்சனத்துக்கு ஆளாகியுள்ளது.
ஒரு அரசியல் கோமாளியாக மாறியிருக்கிறார் பன்னீர்.
