கிரிக்கெட் விளையாட்டை முட்டாள்களின் விளையாட்டு என்று சொல்வார்கள். அந்த விளையாட்டு இப்போது ரத்தம் கேட்கும் வெறித்தனமாக மாறியிருக்கிறது. பெங்களூரு அணி சாம்பியன் கோப்பையை வென்றதும் விராட் கோலியை வானளவுக்குப் புகழ்ந்தவர்கள் இப்போது, அவரை கொலைகாரன் என்று குற்றம் சாட்டுகிறார்கள்.
18 ஆண்டுகளுக்குப் பிறகு பஞ்சாப் கிங்ஸை தோற்கடித்ததன் மூலம் ஆர்சிபி ஐபிஎல் சாம்பியனாக மாறியது. இதையடுத்து நாடெங்கும் கிரிக்கெட் ரசிகர்களிடம் உற்சாகம் பொழிந்தது. இதையடுத்து பெங்களூருவில் வெற்றி விழா ஏற்பாடு செய்யப்பட்டது. விதான் சௌதா முதல் சின்னசாமி அரங்கம் வரை திறந்த பேருந்துகளில் அணிவகுப்பு செல்வதற்கு பாதுகாப்பை காரணம் காட்டி, போக்குவரத்து போலீசார் மறுத்தனர்.
சின்னசாமி அரங்கம் பெங்களூருவின் மையப்பகுதியில் அமைந்திருப்பதால், வாகன நிறுத்துமிட வசதி, எதிர்பார்க்கப்படும் ரசிகர்களின் எண்ணிக்கை, போக்குவரத்து நெரிசல், விபத்துக்கான ஆபத்து ஆகியவற்றை கருத்தில் கொண்டு இந்த முடிவு எடுக்கப்பட்டது. ஆனால், இந்த முடிவு தவறாக மாறியது. ஒரு லட்சம் பேர் கூடுவார்கள் என எதிர்பார்க்கப்பட்ட நிலையில் கிட்டத்தட்ட 3 லட்சம் பேர் கூடியதால் நிலைமையைக் கட்டுப்படுத்த வழியில்லாமல் போய்விட்டது.
இதில் மிகப்பெரும் கொடுமை என்னவென்றால், கூட்ட நெரிசலில் மக்கள் சிக்கி இறந்து கொண்டிருக்கிறார்கள் என தெரிந்தும் நிகழ்ச்சியை தொடர்ந்து நடத்தி முடித்திருக்கிறார்கள். மானங்கெட்ட ஆட்சியாளர்கள், கையாளாகாத அதிகாரிகளை நம்பி 11 அப்பாவி ரசிகர்கள் உயிர் இழந்திருக்கிறார்கள். இறந்தவர்களுக்கு மோடி தொடங்கி அத்தனை தலைவர்களும் வருத்தம் தெரிவித்து வருகிறார்கள். இப்போது இதனை விசாரிக்க கமிஷன் அமைக்கப்பட்டுள்ளது. ஆனால், இதனால் என்ன பயன்..?
இதுபோன்ற கூட்டங்களை சமாளிக்கும் திறன் இல்லாத நாட்டில் வேடிக்கை பார்க்கப் போகும் ரசிகர்கள் நிலையே பரிதாபம். கிரிக்கெட்டை பாருங்கள், பலியாகி விடாதீர்கள்.
