’அண்ணா அடிக்காதீங்கண்ணா” என்று பொள்ளாச்சியில் இளம்பெண்கள்
கதறியதை இன்று வரை யாரும் மறந்திருக்க முடியாது. தமிழ்நாட்டையே உலுக்கிய பொள்ளாச்சி
பாலியல் வழக்கில் குற்றவாளிகள் என அறிவிக்கப்பட்ட 9 பேருக்கும் சாகும் வரை ஆயுள் தண்டனை
விதித்து கோவை மகளிர் நீதிமன்றம் தீர்ப்பு வழங்கியுள்ளது.
கோவையை அடுத்த பொள்ளாச்சியில் இளம் பெண்களை வீடியோ எடுத்து பாலியல்
துன்புறுத்தல் செய்த சம்பவம் தொடர்பாக பாதிக்கப்பட்ட இளம்பெண் ஒருவர் கடந்த 2019 பிப்ரவரி
மாதம் பொள்ளாச்சி அனைத்து மகளிர் காவல் துறையில் புகார் அளித்தார். புகாரின் பேரில்
சபரிராஜன், திருநாவுக்கரசு, சதீஷ், வசந்தகுமார், மணிவண்ணன், பாபு, ஹேரன்பால், அருளானந்தம்
மற்றும் அருண்குமார் ஆகிய 9 பேர் கைது செய்யப்பட்டு சேலம் மத்திய சிறையில் அடைக்கப்பட்டனர்.
இந்த வழக்கில் 48 சாட்சிகளிடம் விசாரணை நடத்தப்பட்டது. சுமார்
200-க்கும் மேற்பட்ட ஆவணங்கள் தாக்கல் செய்யப்பட்டன. வழக்கில் லேப்டாப், செல்போன்,
மெமரிகார்டு, கார் உள்ளிட்ட 30 எலக்ட்ரானிக்ஸ் ஆவணங்கள் பறிமுதல் செய்யப்பட்டன. குற்றப்பத்திரிகை
390 பக்கங்கள் என வழக்கு விசாரணை ஆவணங்கள் மொத்தம் 1,500 பக்கங்கள் நீதிமன்றத்தில்
தாக்கல் செய்யப்பட்டன.
இந்திய தண்டனை சட்ட பிரிவில் 120பி, 366, 342, 354 (ஏ), 354 (பி),
376 (டி), 376 (2) (என்), 509 மற்றும் தகவல் தொழில்நுட்ப சட்டம், தமிழ்நாடு பெண்களுக்கு
எதிரான பாலியல் துன்புறுத்தல் சட்ட பிரிவு 4 ஆகிய பிரிவுகளில் வழக்குப்பதிவு செய்யப்பட்டது.
இந்த வழக்கில் கைது செய்யப்பட்ட 9 பேரும் கோவை மகளிர் நீதிமன்றத்துக்கு அழைத்து வரப்பட்டு
ஆஜர்படுத்தப்பட்டனர். அவர்களிடம் நீதிபதி நந்தினிதேவி, சாட்சி விசாரணை குறித்து தனித்தனியாக
சுமார் 50 கேள்விகளை கேட்டார்.
தொடர்ந்து எதிர்தரப்பு சாட்சி விசாரணைக்காக பொள்ளாச்சி நகர சப்-இன்ஸ்பெக்டர்
மற்றும் பொள்ளாச்சி அரசு மருத்துவமனை இருப்பிட மருத்துவரிடம் விசாரணை நடைபெற்றது. வழக்கில்
அரசு மற்றும் எதிர்தரப்பு விசாரணை முடிவடைந்த நிலையில், கோவை மகளிர் நீதிமன்ற நீதிபதி
நந்தினிதேவி இன்று தீர்ப்பு வழங்கினார்.
அதன்படி,சபரி ராஜன், a2 திருநாவுக்கரசு, a3 சதீஷ், a4 வசந்தகுமார்,
a5 மணிவண்ணன், a6 பாபு, a7 ஹெரன் பால், a8 அருளானந்தம் (முன்னாள் அதிமுக நிர்வாகி),
a9 அருண் குமார் ஆகிய 9 பேருக்கும் சாகும் வரை ஆயுள் தண்டனை அறிவிக்கப்பட்டுள்ளது.
அதோடு பாதிக்கப்பட்ட பெண்களுக்கு 85 லட்சம் ரூபாய் மொத்தமாக இழப்பீடு அறிவிக்கப்பட்டுள்ளது.
முக்கிய குற்றவாளியான திருநாவுக்கரசு 5 பெண்கள் சம்பந்தப்பட்ட குற்றச்செயல் என்பதால்
5 ஆயுள் தண்டனை வழங்கப்பட்டுள்ளது.
பெண்களுக்கு நீதி கிடைத்திருக்கிறது.
