சாதி ஆணவ படுகொலைகளை தடுக்க சிறப்பு சட்டம் கொண்டுவர ஓய்வு பெற்ற
நீதிபதி கே.என். பாஷா தலைமையில் குழு அமைப்பு: சட்டப்பேரவையில் ஸ்டாலின் அறிவிப்பு
செய்திருப்பது பெரும் வரவேற்பு பெற்றாலும், கடும் சர்ச்சையும் எழுந்திருக்கிறது.
இதுகுறித்து ஸ்டாலின், ‘’அறிவை மறைக்கும் சாதிய ஆதிக்க எண்ணத்தால்
நிகழும் சில படுகொலைகள் மிகுந்த வேதனையை அளிக்கின்றன. எனவே, சாதிய ஆணவப் படுகொலைகளைத்
தடுப்பதற்கான பரிந்துரைகளை அளிக்க ஓய்வுபெற்ற நீதிபதி கே.என்.பாஷா தலைமையிலான ஆணையத்தை
அரசு அமைக்கும்…’’ என்று கூறியிருக்கிறார்.
ஆட்சி தொடங்கப்பட்ட காலத்திலேயே இந்த ஆணையத்தை அமைத்திருந்தால்,
அதன் பரிந்துரையின் அடிப்படையில் சட்டம் இயற்றியிருக்க முடியும். வேண்டுமென்றே காலம்
தாழ்த்தி ஆணையம் அமைத்திருப்பது கண் துடைக்கும் வேலை என்கிறார்கள்.
இந்த விவகாரம் குறித்து சீமான், ‘’பிறப்பொக்கும் எல்லா உயிர்க்கும்
என்று உலகிற்கு சொன்ன மண்ணில் சாதியக் கொலை என்பது கேவலம் . சாதிக்காக கொலை செய்யாதே
சாதியை கொலை செய் . தனி நபர் , குழு விசாரனை என்பது காலம் கடத்துவதற்கு , இதுவரை
32 குழுக்கள் போடப்பட்டுள்ளன. என்ன தீர்வு கண்டுள்ளீர்கள்..?’’ என்று கேள்வி எழுப்பியிருக்கிறார்.
சமூக ஆர்வலர்கள் இதுகுறித்து, ‘’ஒருவர் பிறக்கும் போது அவருக்கு
சாதி இல்லை, மதம் இல்லை, வேறுபாடு இல்லை. ஆனால் வளர்ந்தபின் மனிதன் தான் சுவர்களை கட்டுகிறான்
“நான் மேலே, நீ கீழே” என்ற பொய்யை நம்புகிறான். அந்த பொய்யே ஆணவப் படுகொலையின் வேர்.
ஒரு இளைஞன் காதலிக்கிறான்… ஒரு இளம்பெண் கனவு காண்கிறாள்… அது
குற்றமல்ல. ஆனால், அந்தக் காதல் சாதியை கடக்கும்போது, சிலரின் ஆணவம் தாங்கமுடியாமல்
கொந்தளிக்கிறது. அவர்கள் கொலை செய்கிறார்கள், காதலையே குற்றமாக்குகிறார்கள். ஆனால்,
நினைவில் கொள்ளுங்கள் — ஒரு உயிரை கொன்றால் அதில் பெருமை பெருகாது, ஒரு குடும்பத்தை
அழித்தால் சாதி உயராது. ரத்தத்தில் பெருமை இல்லை; மனிதத்தில் தான் பெருமையின் உயர்வு
இருக்கிறது. ஆணவத்திற்கு எதிராக ஒவ்வொருவரும் ஒரு குரலாக எழுவோம்’’ என்று வரவேற்கிறார்கள்.
ஏமாத்திப்புடாதீங்க ஸ்டாலின். சீக்கிரம் இதை சட்டமாக்குங்கள்.
