எதிர்க் கட்சியாக இருந்த நேரத்தில், கருத்து சுதந்திரம் முக்கியம் என்று உரக்க குரல் கொடுத்தவர் ஸ்டாலின். இப்போது அவரே ஆட்சிக்கு வந்ததும் முந்தைய அரசு செய்தது போலவே கருத்து சுதந்திரத்தின் கழுத்தைப் பிடித்து மிதிக்கிறார். தமிழகம் மட்டுமல்ல, மத்தியில் ஆளும் பா.ஜ.க. அரசும் இப்படியே நடக்கிறது.
இந்தியாவுக்கே வழிகாட்டியான திராவிட மாடல் அரசு என்று சொல்லும் தி.மு.க.வும் இப்படியொரு தவறான வழி காட்டலாமா..? விமர்சனம் என்ற பெயரில் தவறான செய்திகளைப் பரப்புவதும், பொய் தகவல்களை பரப்புவதும், விமர்சகர் என்ற போர்வையில் மிரட்டி பணம் சம்பாதிப்பதும், நிச்சயம் தண்டனைக்குரிய குற்றங்கள் என்பதில் யாருக்கும் மாற்றுக் கருத்து கிடையாது. கருத்தை கருத்தாலும், சட்டத்தின் மூலம் மட்டுமே எதிர்கொள்ள வேண்டும்.
ஆனால், அரசுக்கு எதிராக விமர்சனம் செய்தால் எப்படியெல்லாம் பிரச்னைகள் உருவாகும் என்று பத்திரிகையாளர்கள், ஊடகங்களை மிரட்டும் வகையில் சவுக்கு சங்கர் மீது வழக்கு மீது வழக்கு பதியப்பட்டு வருகிறது.
தமிழகம் அறிந்த ஒரு விமர்சகருக்கு கை உடைக்கப்படுகிறது என்றால், அதை யாரும் கேட்க முடியாத நிலைக்கு நாடு இருக்கிறது என்றால், இதை ஜனநாயகம் என்று எப்படி சொல்ல முடியும்? இது தான் திராவிட மாடல் ஆட்சியா என்பதை ஸ்டாலின் சொல்லட்டும்.
