தமிழ் திரையுலகம் சார்பில் நடைபெற உள்ள ‘‘கலைஞர் 100’’ விழாவை முன்னிட்டு நடிகர் விஜய்க்கு, தயாரிப்பாளர்கள் சங்கத்தினர் நேரில் சென்று அழைப்புவிடுத்துள்ளனர்.
மறைந்த முன்னாள் முதலமைச்சரும், தி.மு.க.தலைவருமான மு.கருணாநிதியின் நூற்றாண்டு விழாவை சிறப்பாக கொண்டாடிடும் வகையில் திரையுலகினர் ‘‘கலைஞர் 100’’ விழாவுக்கான ஏற்பாடுகளை செய்து வருகின்றனர். அதன்படி டிசம்பர் 24ம் தேதி சென்னை சேப்பக்கத்தில் கலைஞர் 100 விழா நடைபெறும் என்று நடிகர்கள் ரஜினிகாந்த், கமல்ஹாசன் உள்ளிட்டோருக்கு அழைப்பு விடுக்கப்பட்டுள்ள நிலையில் மிக்ஜாம் புயலால் விழா தள்ளி வைக்கப்பட்டது. அதன்படி வருகிற 2024 ஜனவரி மாதம் 6ம் தேதி ‘‘கலைஞர் 100’’ சென்னை சேப்பாக்கத்தில் நடைபெறும் என்று அதிகாரப்பூர்வ அறிவிப்பு வெளியானது. மேலும் விழாவுக்கு நடிகர்கள் விஜய், அஜித் உள்ளிட்டோருக்கும் அழைப்பு விடுக்கப்படும் என்று ஏற்கனவே தெரிவிக்கப்பட்டிருந்தது.
இதில் நடிகர் விஜய் தனிக்கட்சித் தொடங்குவதால் ‘கலைஞர் 100’’ விழாவுக்கு வருவாரா என்ற சந்தேகம் ரசிகர்கள் மத்தியில் அதிகரித்திருந்தது.
இந்நிலையில் தயாரிப்பாளர்கள் சங்கம் சார்பில், நடிகர் விஜய்க்கு, கலைஞர் 100 விழாவுக்கான அழைப்பு நேரில் விடுக்கப்பட்டுள்ளது. அதே போல் அர்பைஜானில் ‘விடாமுயற்சி’ படப்பிடிப்பில் கலந்து கொண்டிருக்கும் நடிகர் அஜித்குமாருக்கும் அழைப்பு விடுக்கப்பட்டுள்ளதாக தகவல்கள் வெளியாகியுள்ளன. பல வருடங்களாக எந்த சினிமா விழாக்களிலும் கலந்து கொள்ளாத நடிகர் அஜித்குமார், ‘கலைஞர் 100’ விழாவில் கலந்து கொள்வாரா என்பதும் பெரிய கேள்விக்குறியாகவே உள்ளது.
