டாக்டர் ராமதாசுடன் மல்லுக்கட்டுவதையே முழு நேரத் தொழிலாக வைத்திருக்கும்
அன்புமணி ராமதாஸ் ஆதரவு எம்.எல்.ஏ.க்கள் இன்று சட்டமன்றத்தில் தர்ணா போராட்டத்தில்
ஈடுபட்டார்கள்.
அதாவது, பாமக சட்டமன்றக் குழு தலைவர் பதவியில் இருந்து ஜிகே மணியை
நீக்க வலியுறுத்தி சட்டப்பேரவை வளாகத்தில் பாமக எம்.எல்.ஏக்கள் வெங்கடேசன், சதாசிவம்,
சிவக்குமார் ஆகியோர் திடீர் போராட்டம் நடத்தினார்கள்.
இன்று சட்டப்பேரவை சரியாக காலை 9.30 மணிக்கு தொடங்கியதும், திருக்குறளை
வாசித்த சட்டப்பேரவை சபாநாயகர் அப்பாவு, தொடர்ந்து மறைந்த முன்னாள் எம்.எல்.ஏக்களான
புரட்சிமணி, குணசேகரன், கோவிந்தசாமி, அமர்நாத், அறிவழகன், துரை அன்பரசன் என்கிற ராமலிங்கம்,
கலீலுர் ரஹ்மான், சின்னசாமி ஆகிய 7 பேருக்கு முதலில் இரங்கல் தீர்மானத்தை வாசித்தார்.
பின்னர் எம்.எல்.ஏக்கள் அனைவரும் எழுந்து நின்று இரண்டு நிமிடம் மவுன அஞ்சலி செலுத்தினார்கள்.
அதைத் தொடர்ந்து செப்டம்பர் 27ம் தேதி கரூர் தவெக கூட்டத்தில்
நடந்த நெரிசலில் சிக்கி உயிரிழந்த 41 பேருக்கு தனியாக இரங்கல் தீர்மானம் வாசிக்கப்பட்டது.
சபாநாயகரின் கோரிக்கைக்கு இணங்க எம்.எல்.ஏக்கள் எழுந்து நின்று இரண்டு நிமிடம் மவுன
அஞ்சலி செலுத்தினார்கள்.
இந்த இரங்கல் தீர்மானத்தில், முதல்வர் ஸ்டாலின் அவர்கள் சம்பவம்
பற்றி கேள்விப்பட்டவுடனே நேரில் சென்றார், ஆறுதல் கூறினார், மருத்துவ சிகிச்சைக்கு
உத்தரவிட்டார் என்று புகழாரம் சூட்டப்பட்டது.
அதனைத் தொடர்ந்து, கேரள மாநில முன்னாள் முதல்வரும், மார்க்சிஸ்ட்
கம்யூனிஸ்ட் கட்சியைச் சேர்ந்தவருமான அச்சுதானந்தன் மறைவுக்கும், ஜார்க்கண்ட் முக்தி
மோர்ச்சா கட்சி நிறுவனரும், ஜார்க்கண்ட் முன்னாள் முதல்வருமான சிபு சோரன் மறைவுக்கும்,
நாகாலாந்து மாநில ஆளுநராக இருந்த இல.கணேசன் மறைவுக்கும், இந்திய கம்யூனிஸ்ட் கட்சியின்
முன்னாள் பொதுச்செயலாளர் சுதாகர் ரெட்டி மறைவுக்கும், மறைந்த தமிழக ஐஏஎஸ் அதிகாரி மருத்துவர்
பீலா வெங்கடேசன் மறைவுக்கும் இரங்கல் தெரிவிக்கப்பட்டது. மறைந்த அனைவருக்கும் எம்.எல்.ஏக்கள்
எழுந்து நின்று இரண்டு நிமிடம் மவுன அஞ்சலி செலுத்தினர்.
அதிமுக வால்பாறை எம்.எல்.ஏவாக இருந்த டி.கே.அமுல்கந்தசாமி மறைவுக்கு
தனி இரங்கல் தீர்மானம் நிறைவேற்றப்பட்டு, மவுன அஞ்சலி செலுத்தப்பட்டது.
பின்னர் அனைவருக்கும் இரங்கல் தெரிவிக்கும் வகையில் இன்றைய அலுவல்கள்
இதோடு முடித்துவைக்கப்படுவதாகவும், நாளை காலை பேரவை கூடும் என்று அறிவித்துவிட்டு பேரவையை
முடித்துவைத்தார் சபாநாயகர் அப்பாவு.
இந்த நிலையில் பாமக சட்டமன்ற குழு தலைவர் பதவியில்
இருந்து ஜி.கே.மணியை நீக்க வலியுறுத்தி கடந்த 25-ம் தேதி சபாநாயகரிடம் கடிதம் கொடுக்கப்பட்டதாகவும்,
அதன் மீது நடவடிக்கை எடுக்கப்படவில்லை என்று கூறி, அக்கட்சி எம்எல்ஏக்கள் தர்ணா போராட்டத்தில்
ஈடுபட்டனர்.
இதை கண்ட ஜிகே மணி, ‘எத்தனையோ பிரச்னைகளுக்காகப் போராடிய பாமக
இப்படி உட்கட்சிக்குப் போராட்டம் நடத்துவது வருத்தமளிப்பதாகத் தெரிவித்தார்’’.
திமுக அரசு கடைசி வரையிலும் ராமதாஸ்க்கு ஆதரவாகவே நிற்கும் என்பதால்
இப்போதைக்கு இந்த பிரச்னை முடிவுக்கு வரப்போவதில்லை.
