கரூர் நெரிசல் மரணங்களை வைத்து இப்போது அரசியல்
விளையாட்டு ஆரம்பமாகிவிட்டது. சம்பவம் நடந்தவுடனே மருத்துவமனைக்கு ஆஜரான செந்தில்பாலாஜி
மற்றும் அன்பில் மகேஸ் மீது பரபரப்பாக குற்றம் சுமத்தப்படுகிறது. செந்தில்பாலாஜியே
காரணம் என்று விஜய் ரசிகர் ஒருவர் கடிதம் எழுதிவைத்து தற்கொலையே செய்திருக்கிறார்.
இந்த நிலையில் அன்புமணி ராமதாஸ், “கரூர்
துயர சம்பவத்தை வைத்து இவர்கள் அரசியல் செய்துகொண்டு இருக்கிறார்கள். அதில் ஓர் அமைச்சர்
தேம்பித் தேம்பி அழுகிறார். அவருக்கெல்லாம் ஆஸ்கர் விருது தான் கொடுக்க வேண்டும். மக்களை
வெகு நாட்கள் ஏமாற்ற முடியாது.” எனும் ரீதியில் விட்ட அறிக்கை திமுகவினரை கடும்
எரிச்சலாக்கியிருக்கிறது.
அதேபோல் எடப்பாடி பழனிசாமியும் அமைச்சர்கள்
அழுகையை நாடகம் என்று வர்ணித்திருக்கிறார். இதையடுத்து இருவருக்கும் பதில் கூறியிருக்கிறார்
அன்பில் மகேஸ்.
‘’பிணங்களை வைத்து அரசியல் செய்பவர்களுக்கு
உண்மையான அக்கறை வெளிப்படாது. அமைச்சர் ஒருவர் அழுவது போல நடிக்கத் தெரியாமல் மாட்டிக்கொண்டார்
எனச் சொல்லியிருக்கிறார்.
இதே செப்டம்பர் 29-ம் தேதி 11 ஆண்டுகளுக்கு முன்பு அழுகாச்சியோடு ஓர் அமைச்சரவை பதவியேற்பு
நாடகம் நடந்தது பழனிசாமிக்கு தெரியுமா? சொத்துக் குவிப்பு வழக்கில் 2014-ல் நீதிபதி குன்ஹா தீர்ப்பால் தண்டனை விதிக்கப்பட்டதால்
ஜெயலலிதா முதல்வர் பதவியை இழந்தார். அதனால், பன்னீர்செல்வம் தலைமையில் புதிய அமைச்சரவை கண்ணீரோடு பதவியேற்றது.
அப்போது அழுவது போல் நடித்த உத்தமரா இன்று அழுகையைப் பற்றிப் பேசுவது?
ஆளாக்கிய அப்பாவை ஏமாற்றி கட்சியை கபளீகரம்
செய்யும் கைப்புள்ள அன்புமணி பேச்சுக்கு எல்லாம் மதிப்பளிக்கத் தேவையில்லை’’ என்று
கடந்துபோயிருக்கிறார்.
அதேநேரம் திமுகவினர், ‘’கொரோனா காலத்தில்
அனைத்து அரசியல் தலைவர்களும் நிவாரண பணிகள் மேற்கொண்ட போது வீட்டில் முடங்கிய பயந்தாங்கொள்ளி
அன்புமணி எங்கள் அண்ணன் கரூரில் பாதிக்கப்பட்ட மக்களை அதுவும் குழந்தைகளை பார்த்து
உணர்ச்சிவசப்பட்டு அழுததை மனிதாபிமானம் உள்ள எந்த மனிதனும் கேலி பேசமாட்டான்! நாடாளுமன்றத்திற்கு
போனால் கேள்வி கேட்க வேண்டும், விவாதம் செய்ய வேண்டும் அதற்கு தேவையான தெம்போ அறிவோ
இல்லாத காரணத்தால் நாடாளுமன்றம் போகாமல் லீவு லெட்டர் கொடுத்த கேவலமான அரசியல்வாதி
அன்புமணி எல்லாம் எங்கள் அண்ணனை பற்றி பேச என்ன யோக்கியதை இருக்கிறது?
திமுக தயவால் ஒன்றிய சுகாதார அமைச்சராக பொறுப்பேற்ற
அன்புமணி மத்திய பிரதேசத்தில் உள்ள இந்தோர் மருத்துவ கல்லூரிக்கு வட இந்திய மார்வாடியிடம்
கூட்டு சேர்ந்து முறைகேடாக ஒப்புதல் வழங்கி சிபிஐ வழக்குக்கு பயந்து ஓடி ஒளிந்து பாஜகவிடம்
சரண் அடைந்து அப்பா வளர்த்த கட்சியை அடமானம் வைத்து பாஜகவிடம் அண்டிபிழைக்கும் நீங்கள்
அண்ணன் அன்பில் பற்றி பேசலாமா?’’ என்று விரட்டுகிறார்கள்.
