சாமானியருக்குக் கிடைத்த ஜனநாயக வெற்றி
இந்திய அரசியலில் அசைக்க முடியாத சக்தி என்று யாரும் இருக்க முடியாது என்பதை 2024 நாடாளுமன்றத் தேர்தல் அட்டகாசமாக எடுத்துக் காட்டியிருக்கிறது. 400 தொகுதிகளில் வெல்லப் போகிறோம் என்று தேர்தலுக்கு முன்னரே வெற்றிப் பேரணிக்கு அச்சாரம் போட்ட நரேந்திர மோடிக்கு கடிவாளம் போடப்பட்டிருக்கிறது.
அமலாக்கத்துறை, வருமான வரித்துறை, சி.பி.ஐ. மட்டுமின்றி நீதிமன்றம், தேர்தல் கமிஷன் என்று சகல துறைகளையும் கைகளில் வைத்துக்கொண்டு எதிர்க்கட்சித் தலைவர்களை சிறையில் அடைத்துப் போட்ட பிறகே தேர்தலை சந்தித்தது பாரதிய ஜனதாக் கட்சி.
தேர்தல் பரப்புரையில் மத துவேஷத்தைத் தூண்டியதுடன் நில்லாமல் தான் ஒரு தெய்வப் பிறவி என்றும் தைரியமாகப் பேசினார் பிரதமர் மோடி. பிரசார கெடு முடிந்த பிறகும் தியானம் இருப்பதாகச் சொல்லி டிராமா நடத்திக் காட்டினார். ஆனால், ஜனநாயகத்தில் எதுவும் செல்லுபடியாகவில்லை.
மக்களே ஜனநாயகத்தின் அளப்பரிய சக்தி. அவர்களால் எதையும் மாற்ற முடியும் என்பதை மீண்டும் ஒரு முறை நிரூபித்துக் காட்டிவிட்டனர். மோடி இப்போது மீண்டும் பிரதமர் பதவியில் அமர்கிறார் என்றாலும் அவர் பல் பிடுங்கப்பட்ட பாம்பு போன்று வேடிக்கை காட்டுவதற்கு மட்டுமே பயன்படுவார். கூட்டணி ஆட்சிக்கு வித்திட்ட சாமான்ய மக்களுக்கு சலாம்.
